Saturday, July 21, 2012

رمضان زمان و رمضان الان

من اني صغيره  اسمع الناس يحجون بأيام الخير جان عمري سبع سنين واسمع اهلي من يحجون عالنساتل و الببسي و الموز الي جان الشعب العراقي محروم منه اكول هاي وينها الشغلات و يجيني الجواب اووووووو انتو ملحكتو على ايام الخير كبرنا و بدا العراق يتطور و اجانا فريندو ونايس و اهواك و بعدين جتي صرعة الموسم فد نستله الي محد ديتذكر اسمها و اني هم مدا اتذكر اسمها بس هيه جانت جكلت بار و جكلت و بس ماكو شي وياه لا تمر و لابسكت ولا اي شي جانت فد شي طاك كلش بالسوك العراقي و فد طفره نوعيه بالانتاج ** و طبعا مننسى الايس كريم مل بيت بنيه الي لحد الان نتذكره و نكول عليه الله على الرغم من انو هوه جان قمة العويان وبدينه نهجر الببسي الخبط و رجع ببسي الشركه و السينالكو و الصودا الي مادري شون جنه نجرعها بس جان اكو صراع على النادي مل ابو شدراك اول ميفتح كلها تريد صودا على الرغم من انو طعمها جان سخيف جدا واتذكر كلما جنت اكل نستله لازم اكو شخص جبير يمي يذكر فد اسم لنستله اجنبيه مشايفتها بس سامعه بيها و من يشوفني ازبهليت يكول اوووووو انتو ملحكتو على ايام الخير و هم كبرنه و جتي 2003 و جاء التحرير و انفتح السوق العراقي على الببسي و النساتل الي صارت انواعها لا تعد و لاتحصى و لحد هاليوم بعدنه نسمع بأيام الخير! يمكن هيه مسأله شخصيه و كل واحد يشوف الأيام الي جان مرتاح بيها على انو هيه ايام الخير بس لحد يومي هذا معرفت يمتى جانت ايام الخير الي يحجونبيها امي و ابويه. طبعا هسه احنه كبرنا و كمنه نفيك عالجهال و هم كمنه نكول شون جان الزمان و شون جانت الدنيا من جنه صغار و خصوصا بهالوقت من السنه نبقى نحجي برمضان و شون جان رمضان و العيد و الفرحه و الجو و كل الشغلات الي هسه بدت تختفي و صار رمضان ثقل اكثر من ما هوه نعمه و نشوف الناس (و اني منهم) يتشكون من الحر و العطش و الدوخه قبل شهر من رمضان و نادرا ما احد احجي بفضل هالشهر لو شحيسوي شي زين لروحه لو لمجتمعه.

الدنيا تغيرت صح و الناس تغيرو و هذا شي طبيعي جدا بس احنه دائما نشوف عالجانب الموزين و دائما نفكر بالتغيير على انو هوه شي سيء و نتعامل وياه على هالاساس و نرفض التغيير بكل أشكاله و كل انواعه و نريد الدنيا تبقى مثل ما احنه متعودين عليها!!طبعا ماكو هيجي فلم هندي هوه التغيير جاي جاي غصبا ماعلينه و لازم نتقبل الموضوع و برحابة صدر همين مو شون مجان بس ليش ما بدل هالصراع نحاول ننظر للموضوع من جانب ثاني و نتقبل التغيير و نطلع منه شي زين؟ و ليش مو احنه نكون الي نبدي بالتغيير للأتجاه الاحسن؟ ليش دائما ننتضر واحد يجيبلنه شي عالحاضر و احنه نختار ونقرر لو نطبق و يعجبنه لو منطبق و نضل نسبسب؟  الله يرحمه لغاندي عنده حجايه حلوه يكول "كن انت التغيير الذي تريد ان تراه في العالم" منو بينه مطبق هالحجايه؟  اني اول وحده من الناس ممطبقتها و بعيده كل البعد عنها ووضيفتي بالحياة اتذمر و احجي عالشعب و عالحكومه و عالدنيا.

جان اكو دعايه يمكن لو العام لو السنه القبلها يطلع فد شاب يشتري قميص للبواب و يكله رمضان كريم كلش جنت أتأثر بيها و اكول شكد حلو لو هيجي عدنه و اضل ادردم عالناس و شون موزينين واحد ويا اللاخ و مفد يوم فكرت انو اني من ذوله الناس و اني من ذوله الموزينين الي مقصرين بهالموضوع !! صار فتره من توصلت لهالاكتشاف و طبعا ابد مو فخوره بهالشي بس شفت فد صوره فد بيج بالفيس بوك  مسويلها شير و انصدمت بواقع حالي الصوره مكتوب عليها دائما جنت اتسائل ليش محد يغير هالشي الى ان اكتشفت انو اني هذا الاحد.


 
  هاليوم و انطلاقا من هذا التصريح الخطير قررت انو السنه يكون رمضان غير يعني رمضان من صدك مو من ناحية التعبد لأنو الحمدلله كل سنه اسوي الي اكدر عليه من التعبد و احاول ابتعد عن الغيبه والنميمه قدر الامكان (نسوان بعد منكدر هههههه) بس من ناحية الخير و المساعده لأني مقصره هوايه فهاليوم و من هذا المنبر المتواضع اتعهد انو ميفوت يوم من ايام رمضان هالسنه بدون ما اسوي بيه شي خير لأحد غيري ويعني يكون فد شي غير اناني و مالي بيه اي نفع مجرد مساعدة شخص سواء كان فقير او احد رايد  مني شي يتطلب انو اعوف شغله تخصني و اساعده او اي شي ثاني, محددت فد اسلوب معين بس حساعد قدر الامكان و اذا اكو احد عنده مقترح او طريقه ياريت يكلي و اذا احد مهتم يشاركني اتمنى يشاركني لأنو صحيح المستقبل بيدنه و احنه الي نسويه و هذا مو بس حجي الناس تكوله و شعارات و لأنو ماريد يجي يوم يصير عندي جهال و يجون يلوموني ليش الدنيا هيجي و ليش محاولتو تغيروها!

انتو شناوين تسوون؟ اكتبولي بكومنت مقترحاتكم.

رمضان كريم عليكم اجمعين و انشالله تقبل الطاعات.

تبارك

**النستله طلع اسمها لؤي شكرا بتول لأنو لكتلياها و اشكر كل الي حاولو يتذكروها

5 comments:

  1. اوووووووووووه موضوع حساس كولش
    اني اساعد الي بعئالتنه واقاربنه الي محتاج شي او محتاج نصيحه او اي شي اكدر عليه وهذ بحكم وضعي لان لا اطب ولا اطلع والله انشاءالله يقدم الي بي الخير
    عاشت ايدج حبي
    طرحج راقي ومميز وبي لفت نظر الى اكثر من شغله عشتي حبي توكه.

    ReplyDelete
  2. بارك الله بيج وبعللاوي واتمنى تبقين بنفس الحماسه اللي جنتي بيهه من كتبتي هلكلام . طبعا عمل الخير بعد كم مرره من نقدمه يصير تعويد وهذا اجمل مابلموضوع وصدكيني بغض النضر عن الشي اللي تقدمي راح تحسين بشعور رائع . اهم شي اني برايي هوه السريه بلصدقه و المساعده لان تعرفين كلما كانت بلسر اجرهه يم الله يزداد .
    اني عن تجربه شخصيه اشوف نافذة المساعده عاده تكون جدا ضيقه والفرص نادره فدائما احاول استغلهه اولا و افكر ثانيا . طبعا هاي مو افضل نصيحه بالعالم لان مرات تعود بتاثيرات عليه بس اللي يريد شي يعوف شي
    اسف عالاطاله .. مرتللخ بارك الله بيج .. ورمضان كريم

    ReplyDelete
  3. حبيبتي هذا احلى كلام سمعتة بحياتي وكأنو انتي كلتي كل اللي اتمنى اكوله بس مااعرف اعبر عنة ويارب التغيير يبدي من عدنا وينتقل لغيرنا ونساعد الناس ونفسنا ومجتمعنا وننهض بي ويصير ايام خير وسعادة ومحبة وبارك الله بيج على هيج كلام وتفكير جميل

    ReplyDelete
  4. ابدي التغيير من الاقربون ..حاولي تساعديهم بمجرد ان كلمه طيبه او كلام مؤثر ومشجع يحولهم نحو الاحسن واكيد ممكن نساعد الفقره مو الا بفلوس انما بهدوم مثلا عدنا زايده بس مو قديمه لان المفروض ننطي احسن ما عدنا مو اقدم ما عدنا..وحاولي تبدين ابيتج تغيير من ترتيب وغيره مو شرط تغيرين العالم لان كل شخص لو يبدي من بيته رح يتحول العالم نحو الاحسن وكذلك من نطلع بره ما نذب المهملات بالشارع انما نذبها بسله المهملات واذا ماكو احطها بجنطتي الى ان اوصل للبيت..يعني اذا تباوعيلها من منظور جانبي تطلع اشياء بسيطه بس مؤثره

    ReplyDelete
  5. Dear Toka
    i was happy and surprised to find your blog on Hamzmoz it's really good gongrags, i'll put your blogs in RSS feed so i wont miss anything, but you know its hard to imagine this is you ;)!! you should know you have my support in every step you want to go through in this matter its great and feels great as well, i'll start to change one or two of the habits that i do usually which is not good habits and c where that will take us



    MeEEmO ElWa7iSH

    ReplyDelete