Thursday, May 3, 2012

زياره و تساؤلات

بداية احب اوضح ليش كتبت هذا البلوك بالعربي و تحديدا بالجلفي لأنو بس العراقيين حيفتهمون معاناتي. اني انسانه لا وطنيه ولا قوميه ولا ادور اي شي من هالسوالف بس من تصير كدامي شغله من قبل ناس اني محسوبه عليهم تصعد عندي الغيره و الحميه و هالكلاوات و اعبر عن رأيي بصوت عالي جدا سواء انسمع او لا و سواء رأيي صح او غلط و هالشغله كل الناس يعرفوها بيه و عالاكثر اغلبهم ميحبوها بيه!!  فليكدام اذا ما الكم خلك لاتقروه ححجيلكم قصة شغله صارت بيه و اريد جواب على سؤالي و رجاء لا تدخلونه بالسياسه و الحكومه.
اني شيعيه و احب آل البيت و احب ازورهم كلش و احس براحه نفسي من ادخل الحضره و اصلي و اشوف الحمامات تطير براحتها و محد يحجي وياها و هاي الصوره مرسومه بدماغي من طفولتي و اذا ما اكعد بالكاع ورا ما اصلي و ارفع راسي و تفوت من فوكايه حمامه ما احس بالزياره هسه وره الضروف المرينه بيها بعدت عن بغداد بس  احاول كلما اروح لبغداد ازور و بما انو اهل علي (زوجي) قريب عالكاظميه هاي الشغله جتي من حظي فبسهوله نروح نزور. المهم خلي ادخل بالموضوع, قبل اسبوع جنت ببغداد و كالعاده رحت دا ازور الكاظم و تحضرت و اني فرحانه و خالتي انطتني عبايه طبعا للي فالتين من العراق الحبيب (هنيالكم و رجاءا بلا كلاوات الغربه) و ميدرون شصار مصار وراهم هسه العتبات المقدسه متنفات اذا مو لابسين عباية راس! طبعا ماريد اخش بهذا الموضوع لأنو اذا انفتحت بعد ما اسكت المهم رحنه للكاظميه ونزلنه من التكسي باخر نقطه ممكن توصلها سياره و نزلنه مشي من هالمكان للأمام اكو حسب ما اتذكر 3 نقاط تفتيش بعدين و طبعا الي يفتشون ولو اني عاذرتهم كاعدين و الجو جان رطوبه و اكيد طاكه روحهم بس شنو يدردمون كل وحده تفوت من تطلع يذبولهم فد حجايه هالكبرها و اني اكول بكلبي الله يستر من اطلع شحيكولون عليه!!! وره نقاطا لتفتيش الي هيه شبه كلاوات وصلنه للأمام هنا عاد بالباب اكو كرفانات و تفتيش صدك بباب الكرفان اكو رجال واكف و يدردم عالشعب اي وحده تفوت طالعه شعرابه من راسها و ترزلت الي ملابسه عبايه تترزل و اكو وحده جانت دتضحك هم ترزلت و كللها ليش تتمضحكين!! يعني شون نبطل؟ و طبعا الي غلطانه غلطة عمرها و جايه خاله ميكب هاي الي الله كتبها عليها تالي دخلت بكرفان يؤدي الى كرفان لاخ و عينك متشوف الا النور و اذا كدامي ست سراوات من النساء المتشحات بالسواد و الرطوبه تكتللللللللللل و الحر ماسولفلكم عليه و السره طويل هم وكفت حالي حال العبريه و شبعت كفخات و و بعد انتضار دام اكثر من عشر دقايق و بعد ان خنزرت على الي واكفه ورايه يجي اربع مرات وصلني السره و كلت ايه و اخيرا طبعا هنا احب انوه انو اني ابدا ما اخذ ويايه جنطه من ازور تلافيا لما سيحصل هسه لأنو همه الناس خالين قطع كبار بيها الشغلات الممنوع تدخل بس هالمره لضروف اضطريت اخذ جنطه و اني جايه من سفر فجنطتي مليانه غراض بس حاسبه حسابي ففرغتها من كلشي قبل ما اجي. وصلت لأم التفتيش و صعدت عالدجه و ابتسمت بوجهها طبعا هيه رمقتني بفد نضره مدري شون كايله و كلت يلله عادي فتحت الجنطه و بكل بطؤ تفتح جيب و تجيك و تلكاه فارغ و تسده و تفتح اللاخ و تلكاه فارغ و تسده و هم ارجع و اكول جايه من سفر و جنطتي على كولت علي مشتمل بيها كومه جيوب و جان يطلع اكو جيب ناسيته اني و تفتحه و يطلع بيه لوشن! جان تكلي هذا مكياج رجعي للأمانات .... لا يا الهي مستحيل حرجع اوكف سره كتلها يابه ذبيه ماريده قفلت عاد ويايه و جان ارجع طبعا ماكو طريق رجعه لازم بنفس الممر الدخلت بيه و اني و عبايتي و الشتائم تنهال عليه من كل صوب و حدب و التعليقات وياها "ياخاله ليش جيتي منانه مو ذاكه طريج وين تروح الاوادم ماتكلولي" و "يا خاله لمي عباتج كنستي الأمام كله" و اني اتعذر و امشي لأنو شبعت الاوادم كفخات الما طلعت و حتى تكمل السبحه اخر وحده داست على عبايتي و الا شويه و اتجقلب بس الله ستر!! طلعت المهم و رحت للأمانات  وخليت غراضي و رجعت بالسره مره اخرى طبعا هالمره بالدخله جنت من ضمن الناس الي رزلهم الحجي الي واكف بالباب لأنو عبايتي وكعت و بهالاثناء وحده داست على عبايتي و رزلتني ههههههه الحلو انو رزلتني فاني فقدت اعصابي و بديت ادردم و بديت الوم نفسي ليش جيت؟ هم هيجي زياره متنراد و رجعت وكفت بالسره بس الحمدلله مطول هوايه يجي خمس دقايق و طلعت ودخلنه و وكفني واحد بالطريق و هوه مديباوع عليه و يأشر بيده و يكول "حجابج" زين اذا انته مدتباوع عليه شمدريك حجابي بي شي؟ دخلنه جوه و طبعا هم اكو مرحلة تفتيش ثانيه جوه فقط لحاملي الحقائب يعني عبالك جانو متقصديني ديحسسوني بالذنب  و هنا بده فلم لاخ الي هوه الضريح جوه اكو فد وحده شايله فرشه مل تنضيف اخشاب هاي الملونه و تضرب العالم على روسهم اذا تأخرو اني اطب و اطلع ما اطول عادة بس حصلتلي كفخه بالغلط و انحشكت بنص العالم و عصيت لأنو الي تلزم الشباج بعد هاهيه متهده تالي طلعت وره عناء و جان الكا خالتي واكفه دتريد تصلي و اكتشفت انو اكو صلاة قضاء حاجه يم الضريح اني هم طبكت عالسره داصلي و بصفي وحده ايرانيه و ويا ما اني كملت صلاة أحد داس على جفيتها و اذا بيهاعاطت بأذني شكل عيطه خلتني بطفره وحده اكوم و الم جوالاتي و اطلع و اكعد بره هنا عاد بدا الجزء الحلو صليت و الحمدلله و كملت و كعدت صفنت عالسكف الي هوه من اجمل المناضر الي ممكن الانسان يشوفها بحياته و على الرغم من انو كل الموجودين لابسين عبايات سوده ماكو انعكاس لأي شي اسود المرايات تعكس البياض مل المرمر بس! ياترى همه مصمميها هالشكل لو هاي صدفه مادري بس المنضر مثل ما اني اعرفه و حافضته اكثر منضر بالدنيا يهديني و يخليني احس براحه نفسيه مو طبيعيه و فاتت الحمامه و صدك حسيت الدنيا بخير نسيت الهوسه و التدفع و الكفخات وو الحر و الرطوبه و الحجي الي بالبابو  كلشي حسيت مثل متكول ماما " اني في رحاب الرحمن" كملنه صلاة و طلعنه و اني مبتسمه و داتفرج عالتغييرات الي بالصحن الي كلش حلوه و منضر الناس ديصلون و يقرون ادعيه شي صدك يفتح النفس عالحياة ووصلنه للباب و نفس الرجال الي أشرلي و كلي حجابج باوع عليه و راد يحجي شي و خنزرت بوجهه وسكت هههههه حسيت بنوع من الفخر السخيف جدا.

هسه وره هالقصه اكيد تتسألون شكو هلكد حجيتي و خصم الحجي شتريدين يعني؟ الي اريد اكوله انو ليش هالاسلوب الجاف بالتعامل؟ و ليش هالصياح و الرزايل الي ما الها داعي؟ و ليش هالهمجيه؟ و ليش ويه العراقيين يتعاملون هيجي و الايرانيين همه عبالك اسياد المكان على الرغم من انو اني سامعه العراقيين بأيران ميعاملوهم زين من يزورون؟ و ليش بعدين وره هذا كله نجي نكول ليش الناس يحجون علينه؟؟ ممكن احد يكلي؟ طبعا احب انوه عن فد فقره اني سويتها عن قصد كل الي بالتفتيش ابتسمت بوجههم ولا وحده بيهم ابتسمت بوجهي!! هم ليش؟


Picture From PubArab